Javascript DHTML Drop Down Menu Powered by dhtml-menu-builder.com



::: الطفلة "يسمى" ما بقى تبرد ولا تنوجع ولا بدها دوا ولا حتبكي ابدا .. أنتهت اوجاعها .. صارت ملاك في السماء... رح تخبر ربنا عنكن كلكن :::

أضيف بتاريخ: 08-11-2020

شبكة اخبار النبطية
" يسمى" أغمضت عيناها الى الابد ... خطفها " السرطان" بعدما قاومته ببسمتها الرقيقة ، أسلمت الروح لترتقي طيرا من طيور الجنة
فارقت الحياة في احدى المستشفيات الفرنسية بعد رحلة معاناة من العلاج من لبنان الى غانا الى فرنسا، حيث ستدفن يوم الاثنين 9 تشرين الثاني 2020 في المقبرة الاسلامية في مدينة ليون الفرنسية

"يسمى زين نصر الدين" ابنة السنوات ال5 ، حكاية بطولة لطفلة حاربت السرطان لثلاثة سنوات وكانت مثالا لمواجهته..
"يسمى" أغنية حب وجمال ستظل ترددها قلوب الأنقياء.
ابنة جبيل مدينة والدها المهندس زين نصر الدين ، وكفرحمام قرية والدتها المهندسة هنا سمور ،
لروحك السلام أدمت القلوب وأدمعت العيون.
الله يرحمك "يسمى" ويصبر قلوب أهلك ومحبينك.


" يسمى" ما بقى تبرد...
ما بقى تنوجع ...
ما بقى بدها دوا....
ما بق حتبكي ابدا ....
كن وقت ما راحت انتهت احزانها ... انتهت اوجاعها انتهى كربها
بلش فرحها، بلش أنسها، بلشت راحتها هالدنيا بشعة فيها امراض وموت وفراق وحزن وجوع وبرد وكرب وبلاء ...
الجنة فيها كل شي بدها يا يسمى ، اولها الراحة والطمأنينة ......
ما لا عين رأت، ولا أذن سمعت ، ولا خطر على قلب... هي رُزقت الجنة بلا عذاب ، وبلا سؤال ان شالله

هيك نومة الملائكة بتكون، هيدا آخر صباح تصبحتو فيكي يا قلبي وقت كنتي بعدك معنا بالدنيا و كان قلبك بعدو عم ينبض.
صورتك و ما كنت عارفة انو آخر صورة رح صورك ياها ، الحمدلله نمتي مرتاحة يا مامي، و الحمدلله نمتي مطرح ما بتحبي بالبيت حد الماما و البابا و أختك هيا.
ما بقا مجبورة تاخدي الادوية المرة كتير ولا بقا تخافي من شكة الابرة ولا بقى يضيق نفسك ولا بقا تنوجعي يا روح الماما.
انت كنت بركة البيت، انت علمتينا نصبر و نشوف الدنيا اديه صغيرة، علمتينا نحب ونكون قوايا ، عرفتينا على ناس كتير كرمال يواسونا عغيابك.
الحمدلله ربنا اختارنا انا و بيك لنربي ملاك و لنهتم بملاك سميناه Yasma ، فراقك صعب كتير "princesse",
بودعك يا عمري، بأمان الله،
روحي يا ماما عند رب رحيم احن مني ومن بيك عليكي, روحي يا ماما لعبي و نبسطي قد ما بدك .
قصتنا ما خلصت رح تضلي محفورة بقلبي جوا الى حين........
بعتذر ما قدرت رد عكل الاتصالات، انا بتشكر كل مين عزانا و واسانا. الله يرحم اموتاكم و يحمي محبينكم.
لكل حدا رسم ضحكة عوج الملاك يسمى ، و لكل حدا دعالا وصلالا حتى لي ما بيعرفا ولكل حدا فكر فينا و بيسمى، بدي قلكن انو الملاك يسمى، رح تخبر ربنا عنكن كلكن.

يسمى لمست قلب الكثيرين كما لا يستطيع ان يفعل الا ملاك.
يسمى ليست الان حيث اردنا لها ان تكون، هي الان حيث اراد الله ان تكون.
يسمى ملاك في السماء الان...
ارقدي بسلام ايها الملاك الصغير وادعو لنا من مكانك الجميل

يسمى تتذكري قبل ما تفلي بكم يوم قلتلي غمرني وبوسني .
ايه بدي اغمرك وبوسيك يا بيي،
والله كسرتلي ضهري بس الحمدالله اني مطمن عليك محل ما انتي.
الحمد الله على كل شي ولا اعتراض على مشيئة رب العالمين.
ما كنا عارفين انا وامك انه عم نربي ملاك ، علمتينا الصبر والقوة وانه ننحارب لاخر لحظة .
لي بعزينا انه هلقد في ناس بتحبك وزعلوا عليكي بس فليتي بس كلنا عارفين انك بمحل احسن من هون بكتير .

يسمى ما ماتت يسما نامت... راحت محل تنام في كتير حلو... احلى من هون... راحت تسلم عكل لسبقوها... راحت اول شي تسلم عستا هيام.. يسمى نامت احلى نومه...
يسمى قطعه من قلبي... يسمى راحت و اخدتني معا
ما حدا يقول يسمى ماتت يسمى نامت مزبوط؟؟
يسمى كانت قويه و حاربت ما ملت ضلت بالمعركه
بس انا زعلان لانو ما قدرت اربح المعركه معا
يسمى كانت ترسمني و تقلي هيدا انت يا خالو بلال
شوفو يسمى شو حلوه شفتوها ، شوفو يسمى شو مهضومه طلعوا منيح بهالملاك لي طار لفوق و علا.. شفتو ليش بحبا ليسمى و بعرف انو كلكن حبيتوها مندون ما تشوفوها.. هي كانت تكتبلكن و تقلكن دعولي و صلولي هلء هي عم تدعيلنا و تصليلنا من فوق فوق فوق من بعيد ناطرتنا
الدنيا حزينه يا يسمى... كل العالم بتحبك
نيال الجنه فيكي يا خالي
بحبك يسمى و الله العظيم بحبك

اخر كلمات للطفلة يسمة قبل الوفاة بأيام:
قال الاطباء ان السرطان الخاص بي قد تقدم وتقدم. لم يعد هناك خيارات علاج اخرى وقلبي متعب جدا ايضا.
تم ارسالي الى المنزل برعاية مسكنة ونصح والدي بجعل الاسابيع القليلة الماضية مريحة قدر الامكان. لا!! انا لن استسلم!!! لكني فقط احتاج الى صلواتك اكثر من ذي قبل. 🙏🙏🙏

تنويه : النصوص المنشورة هي لكلمات كتبت عن "يسمى" على مواقع التواصل الاجتماعي









 




New Page 1